Punjab government ਦਾ ਤੋਹਫ਼ਾ, ਹੁਣ ਕਣਕ ਦੇ ਨਾਲ ਮੁਫ਼ਤ ਮਿਲੇਗੀ ਦਾਲ, ਖੰਡ, ਤੇਲ ਅਤੇ ਹਲਦੀ
ਚੰਡੀਗੜ੍ਹ: 23 ਫਰਵਰੀ, 2026
ਪੰਜਾਬ ਦੇ ਮੁੱਖ ਮੰਤਰੀ ਭਗਵੰਤ ਮਾਨ ਨੇ ਅੱਜ ਸੂਬੇ ਦੇ ਗਰੀਬ ਅਤੇ ਲੋੜਵੰਦ ਪਰਿਵਾਰਾਂ ਲਈ ਇੱਕ ਵੱਡੀ ਲੋਕ-ਭਲਾਈ ਸਕੀਮ 'ਮੇਰੀ ਰਸੋਈ' ਦਾ ਐਲਾਨ ਕੀਤਾ ਹੈ। ਮੁੱਖ ਮੰਤਰੀ ਨੇ ਕਿਹਾ ਕਿ ਪੰਜਾਬ ਦੇਸ਼ ਦਾ ਅੰਨਦਾਤਾ ਹੈ ਅਤੇ ਸਰਕਾਰ ਇਹ ਯਕੀਨੀ ਬਣਾਏਗੀ ਕਿ ਸੂਬੇ ਦਾ ਕੋਈ ਵੀ ਪਰਿਵਾਰ ਪੋਸ਼ਟਿਕ ਖ਼ੁਰਾਕ ਤੋਂ ਵਾਂਝਾ ਨਾ ਰਹੇ। ਉਨ੍ਹਾਂ ਕਿਹਾ ਕਿ ਸਿਰਫ਼ ਕਣਕ ਵੰਡਣ ਨਾਲ ਰਸੋਈ ਪੂਰੀ ਨਹੀਂ ਹੁੰਦੀ, ਇਸ ਲਈ ਹੁਣ ਸਰਕਾਰ ਤੜਕੇ ਦਾ ਸਾਮਾਨ ਵੀ ਮੁਫ਼ਤ ਮੁਹੱਈਆ ਕਰਵਾਏਗੀ।
ਕੀ ਹੈ 'ਮੇਰੀ ਰਸੋਈ' ਫੂਡ ਕਿੱਟ?
ਮੁੱਖ ਮੰਤਰੀ ਅਨੁਸਾਰ, ਨੀਲੇ ਕਾਰਡ ਧਾਰਕਾਂ ਨੂੰ ਪਹਿਲਾਂ ਵਾਂਗ ਮਿਲਣ ਵਾਲੀ ਕਣਕ ਦੇ ਨਾਲ-ਨਾਲ ਹੁਣ ਇੱਕ ਵਿਸ਼ੇਸ਼ ਫੂਡ ਕਿੱਟ ਮਿਲੇਗੀ। ਇਸ ਕਿੱਟ ਵਿੱਚ ਹੇਠ ਲਿਖੀਆਂ ਚੀਜ਼ਾਂ ਸ਼ਾਮਲ ਹੋਣਗੀਆਂ:
ਦਾਲਾਂ: 2 ਕਿਲੋ ਮਾਂ-ਛੋਲਿਆਂ ਦੀ ਦਾਲ।
ਚੀਨੀ: 2 ਕਿਲੋ ਖੰਡ।
ਤੇਲ: 1 ਲੀਟਰ ਸ਼ੁੱਧ ਸਰੋਂ ਦਾ ਤੇਲ।
ਨਮਕ: 1 ਕਿਲੋ ਆਇਓਡਾਈਜ਼ਡ ਨਮਕ।
ਹਲਦੀ: 200 ਗ੍ਰਾਮ ਹਲਦੀ ਪਾਊਡਰ।
40 ਲੱਖ ਪਰਿਵਾਰਾਂ ਨੂੰ ਮਿਲੇਗਾ ਸਿੱਧਾ ਲਾਭ
ਇਸ ਸਕੀਮ ਨਾਲ ਪੰਜਾਬ ਦੇ ਲਗਭਗ 40 ਲੱਖ ਨੀਲੇ ਕਾਰਡ ਧਾਰਕ ਪਰਿਵਾਰਾਂ ਨੂੰ ਫਾਇਦਾ ਹੋਵੇਗਾ। ਮੁੱਖ ਮੰਤਰੀ ਨੇ ਸਪੱਸ਼ਟ ਕੀਤਾ ਕਿ ਸਰਕਾਰ ਦਾ ਮਕਸਦ ਸਿਰਫ਼ ਅਨਾਜ ਵੰਡਣਾ ਨਹੀਂ, ਸਗੋਂ ਗਰੀਬ ਦੀ ਰਸੋਈ ਨੂੰ ਆਰਥਿਕ ਤੌਰ 'ਤੇ ਮਜ਼ਬੂਤ ਕਰਨਾ ਹੈ। ਉਨ੍ਹਾਂ ਇਹ ਵੀ ਭਰੋਸਾ ਦਿੱਤਾ ਕਿ ਵੰਡੀ ਜਾਣ ਵਾਲੀ ਕਣਕ ਅਤੇ ਹੋਰ ਸਮਾਨ ਦੀ ਗੁਣਵੱਤਾ (Quality) ਉੱਚ ਪੱਧਰੀ ਹੋਵੇਗੀ ਅਤੇ ਖ਼ਰਾਬ ਅਨਾਜ ਦੀ ਸ਼ਿਕਾਇਤ 'ਤੇ ਸਖ਼ਤ ਕਾਰਵਾਈ ਕੀਤੀ ਜਾਵੇਗੀ।
ਭਗਵੰਤ ਮਾਨ ਨੇ ਆਪਣੇ ਵਿਲੱਖਣ ਅੰਦਾਜ਼ ਵਿੱਚ ਕਿਹਾ ਕਿ ਘਰ ਦਾ ਚੁੱਲਾ ਸਭ ਤੋਂ ਵੱਡਾ 'ਚਾਰਟਡ ਅਕਾਊਂਟੈਂਟ' ਹੁੰਦਾ ਹੈ, ਜੋ ਪਰਿਵਾਰ ਦੀ ਆਰਥਿਕ ਹਾਲਤ ਬਿਆਨ ਕਰਦਾ ਹੈ। 'ਮੇਰੀ ਰਸੋਈ' ਸਕੀਮ ਰਾਹੀਂ ਸਰਕਾਰ ਇਨ੍ਹਾਂ ਚੁੱਲਿਆਂ ਦੀ ਅੱਗ ਅਤੇ ਪਰਿਵਾਰਾਂ ਦੀ ਸਿਹਤ ਨੂੰ ਬਰਕਰਾਰ ਰੱਖਣ ਦੀ ਕੋਸ਼ਿਸ਼ ਕਰੇਗੀ।